අවුලක් එක්ක වතුර ප්‍රශ්නයක් (තෑගී නැති ප්‍රශ්න - 9)

සෑහෙන දවසකට පස්සේ ආපහු බ්ලොග් එකට ගොඩවුනා පෝස්ට් එකක් දාන්න කියලා හිතාගෙන.ජනවාරි 27 වෙනිදා ගම්පහදී පැවැත්වුණු ගෙට්ටුවට සහභාගී වෙන්න බැරි වුනේ පොඩි කේස් එකක් වැටුණු හින්දා.ඒක අර මං කලින් පෝස්ට් එකක කිව්ව එක්සෑම් එක සම්බන්ධ දෙයක්.කේස් එක මේකයි.

මේ අවුරුද්දේ පළවෙනියටම දාපු පෝස්ට් එකේ කිව්වානේ මං මඟ ඇර ඇර හිටිය එක්සෑම් එකක් ගැන.මං කරපු කෝස් එක අවුරුද්දක එකක්.(ඒකෙ තවත් ඉස්සරහට කරන්න තියෙනවා.මං කරේ මුල් අවුරුද්ද කියන කොටසට අදාළ ටික) මේ කෝස් එක කොටස් දෙකයි.පළවෙනි එක Practical.දෙවෙනි එක Theory.Theory එකට අදාළ එක්සෑම් ෆී එක රු.18000.00/=ක්.මේ එක්සෑම් එක Online ලියන්න තියෙන්නේ.ඉතින් තමන්  කැමති දවසක ඒකට අදාළ ෆී එක ගෙවලා මේ එක්සෑම් එක කරන්න පුළුවන්.ඉතින් මං එක්සෑම් ෆී එකත් කෝස් පටන්ගද්දිම ගෙවලා දැම්මා කෝස් එක ඉවර වුනාම ලියලා දාන්න හිතාගෙන.

ඉතින් ඔය එක්සෑම් එකට අදාළ වවුචර් එක ගන්න මං ගිය සතියේ කොළඹ තියෙන අපේ ඉන්ස්ටියුට් එකේ හෙඩ් ඔෆිස් එකට ගියා. ගිහින් මං කරපු කෝස් එකට අදාලව තියෙන ගෙවීම් කරපු Invoice ටික ඉදිරිපත් කළා.ඉතින් මේ Invoice ටික බලලා එතන හිටිය විභාග අංශයේ සර් කියපි,

"ඔයා ගෙවලා තියෙන එක්සෑම් ෆී එක දැන් කල් පැනලා..!" කියලා.

"මොකක්! ඒ කොහොමද!කොහොමද එහෙම වෙන්නේ?"

"ඔයා මේ එක්සෑම් ෆී එක ගෙවලා දැන් අවුරුදු දෙකකටත් වැඩියි.ඒ එක්සෑම් ෆී එක වලංගු ගෙවපු දවසේ ඉදලා අවුරුද්දකට..!" 

"මොකක්! මට එහෙම දෙයක් කිව්වේ නෑනේ කෝස් එකට රෙජිස්ටර් වෙලා එක්සෑම් ෆී එක ගෙවද්දී..! එහෙම කිව්වානම් මං ඕක ගෙවන්නේ නෑනේ ඒ කාලේ. එක්සෑම් එක  කරන දවසට ගෙවනවානේ එහෙනම්..!.මට කිව්වේ වවුචර් එක අවුරුද්දක් ඇතුලත අවලංගු වෙනවා කියලා"

"ඒකනම් මං දන්නේ  නෑ. ඔයාට වවුචර් එක ගන්න ලෙටර් එක පාස් කරන්න බෑ මේ හින්දා.."

"එහෙම කොහොමද වෙන්නේ සර්! අනික මට ඒ කෝස් එක ඉවර කරන්න ලැබුනෙත් අවුරුද්දකුත් පහුවෙලා.අපේ හිටපු ලෙක්චර් ඉන්ස්ටිටියුට් එකෙන් අයින් වෙලා ගියාට පස්සේ Theory එක කවර් කරෙත් සෑහෙන කාලෙකට පස්සේ..ඒ වෙන කෙනෙක් එතෙන්ට එනකම් හිටපු හින්දා. ඒ ලෙක්චර් එද්දී ක්ලාස් එක පටන්ගද්දී හිටපු අයගෙන් ඉතුරුවුණේ මායි, තව කෙනෙකුයි විතරයි.අන්තිමේදී ඒකාත් නැවතුනා.ඉතින් මගේ ක්ලාස් එක නැවතුනා. අත්හැරුණු අනිත් පාඩම් කවර් කරගත්තේ අලුතෙන් පටන් ගත්ත ක්ලාස් වලට ගිහින්.."

"ඔව්, ඉතින් .."

"ඉතින් එක්සෑම් එක ලියන්න ඕනේ ක්ලාස් එක කවර් කරන්න වුනාට පස්සෙනේ.එහෙනම් ඒ දවසේ ඉදලා අද වෙනකම් බැලුවත් තාම අවුරුද්දක් ඉවරවෙලාත් නෑ.අනිත් ළමයි එක්සෑම් ෆී ගෙවන්නේ ඒ Theory එක ඉවර වුනාම.ඒකත් එක්සෑම් ලියන දවසට.ඒත් මං මුලින් කරේ මට ඒ දේ නොකිව් හින්දා.මට කිව්වේ වවුචර් එක අරන් අවුරුද්දක් ඇතුලත එක්සෑම් එක නොලිව්වොත් අවලංගු වෙනවා කියලා.ඉතින් මං තාම වවුචර් එක අරන් නෑ.ඉතින් එක්සෑම් ෆී එහෙම අවලංගු කරන්න බෑනේ.."

ඔහොම සෑහෙන වෙලාවක් මට තර්ක විතර්ක කරන්න වුනා ඒ සර් එක්ක.අන්තිමේදී මං කිව්වා එහෙනම් මං ගෙවපු ඒ එක්සෑම් ෆී එක ආපහු දෙන්න. මං වෙන තැනකින් එක්සෑම් එක දාන්නම් කියලා.එතකොට ඒ සර්..

"එහෙම සල්ලි දෙන්නේ නෑ ආපහු.එහෙනම් ඔයා මෙහෙම කරන්න.ලියුමක් ලියන්න ඔයා ඔය කියපු හැමදේම කියලා ......... සර්ගෙ නමට ඇඩ්රස් කරන්න.ලියන්න මේ කාරණා ගැන සලකා බලලා සහනයක් සලසලා දෙන්න කියලා.එයා තමා ඒ ගැන බලන්නේ.මං බෝඩ් එකට දාන්නම්.හැබයි මේක පාස් වෙයිද කියන එක ෂුවර් නෑ. තව දවස් කිහිපයකින් කෝල් කරලා බලන්න කියලා.මේක අදම කරගන්න වෙන්නෑ.."

ඒක අහලා ආයෙත් තදවුනා තව දවස් ගානක් ඉන්න කියපු එකටයි,වැඩේ ෂුවර් නෑ කියපු එකටයි,ගෙවපු සල්ලිත් නැති වෙන එකටයි.මං ලියුම ටිකක් වෙලා යනකම් නොලියා හිටියා.එතකොට ඇහුවා, "ඇයි ලියන්න බෑ වගේද" කියලා. මං අපේ තාත්තාටත් කෝල් එකක් අරන් මේ කේස් එක කිව්වා. එයා ඇහුවා කතාකරන්නද කියලා ඉන්ස්ටිටියුට් එකේ ප්‍රධානියාට.ඒ අපේ තාත්තාගෙ හොදම යාළුවෙක්ගේ යාළුවෙක්.අපේ තාත්තාගේ හැටි දන්න හින්දා මං කිව්වා, 

"පොඩ්ඩක් ඉන්න.මං මේ ලියුම ලියලා බලන්නම්.අදම කරගන්න බැරිම වුනොත් එයාට කතාකරන්න" කියලා.

ඊට පස්සේ මං ලියුම ලිව්වා කොළයක් ඉල්ලන්.ලියාගන්න තේරෙන්නෙත් නෑ. බාගෙට එකක් ලියලා, ඒක හරි නෑ කියලා හිතුනු හින්දා ආයෙත් කොළයක් තව එකක් ලිව්වා.ලියලා ඉවර වුනේ කොළේ දෙපැත්තම ලියවිලා.ඊට පස්සේ ඕක අතේ තියාගෙන ඇතුලට ගිය අර සර් එළියට එනකම් ඉද්දි කැරකි කැරකි ඉද්දි ඉන්ස්ටිටියුට් එකේ ප්‍රධානියා ආවා.එයාට මේ ගැන කියන්න ඕනේ කියලා හිතද්දීම එතනට ආවා උදේ ඉන්ස්ටිටියුට් එකේදී හම්බුනු සර් කෙනෙක්. එයා ඇවිත් මගේ වැඩේ හරිද කියලා ඇහුවා.

"නෑ සර්. _ _ _ සර් කිව්වා ලියුමක් ලියන්න කියලා.දැන් ලියලා ඉවරයි.ඒකටත් මට තව දවස් ගානක් ඉන්ට කිව්වා උත්තරයක් දෙනකම්. මං _ _ _ _ සර් (ඉන්ස්ටිටියුට් එකේ ප්‍රධානියා) එක්ක මේ ගැන කතා කරන්නද? නැත්නම් සර් මේ ගෙවපු සල්ලිත් මට නැතිවෙනවා.." කියලා.

සර් මං ලියපු ලියුම බලලා "ඕ.. ඔයා එහෙම කරන්න.ලොකු සර් මොනවා හරි කරලා දෙයි. ලියුම කියෙව්වාම තේරෙනවා ඔයාටයි මේකේ අවුල වෙලා තියෙන්නේ කියලා."

"එක්කෝ පොඩ්ඩක් ඉන්න. මට ලියුම දෙන්න. මං අනිත් අයත් එක්ක මේ ගැන කතා කරලා බලන්නම්.."

කියලා ඒ සර් මගේ අතේ තිබුණු ලියුම අරන් ගිහින් ලියුම ඇඩ්රස් කරපු කෙනාව මීට්‌ වුනා.එයාට ලියුම පෙන්නලා, ඒ ගැන කතා කරලා මට ඇතුලට කතා කරා,

"මට තේරෙනවා අපේ ආයතනය පැත්තෙනුත් ඔයාට වැරද්දක් වෙලා තියෙනවා කියලා.අනික ඔයාගේ ක්ලාස් එකත් හරියට කවර් වෙලා නෑනේ.මං ඔයාට එක්සෑම් වවුචර් ලෙටර්  එක පාස් කරන්නම්.ඔයා ඒක නුවරින් කලෙක්ට් කරගන්න.කොළඹ එන්න ඕනේ නෑ ආපහු මේ වැඩේට.ආය අතහැරුණු පාඩම් කවර් කරගන්න Free අනිත් ක්ලාස් වලට යන්නත් හදලා දෙන්නම් Revision එක්කම.මං නුවර ඉන්ස්ටිටියුට් එකට කතා කරලා කියන්නම් ගැන ." කියලා.

ඉතින් ඒ විදිහට සෑහෙන කට්ටක් කාලා මගේ එක්සෑම් වවුචර් එක පාස්කරගත්තා.අන්තිමේදී මං ලියපු ලියුමේ කොපියකුයි, කොළඹින් Theory ක්ලාස් වලට ෆ්‍රී යන්න දුන්නු ලියුමයි අරන් ජනවාරි 27 මට නුවර ක්ලාස් එකට එන්න කිව්වා.

ඉතින් ඔය හේතුව හින්දා තමා බ්ලොග් ගෙට්ටුවට එන්න බැරිවුනේ.මේ දවස් වල ආපහු ක්ලාස් යනවා.පාඩම් කරන්නත් පටන් ගත්තා.මේ මාසේ අන්තිම එක්සෑම් ලියන්නයි ඉන්නේ.ලියන්න හිතන් හිටිය දින එහා මෙහා වුනේ ක්ලාස් යන්න පටන්ගත්ත හින්දා.ඒ අස්සේ අයියාත් එක්ක එයා බාරගත්ත වෙඩින් වගයක Photography වලටත් යන්න තියෙනවා. මේ පොස්ට් එක පබ්ලිෂ් වෙන අදත් වෙඩින් එකක්.

ගේට්ටුවේදී වුනු දේවල් කියවලා, ෆොටෝ දැකලා සහභාගී වෙන්න බැරි වුන එක ගැන හිතට පොඩි දුකක් දැනුනත්, ඒ දුක නැති වුනේ අප්‍රේල් 21 ආපහු බ්ලොග් ලියන අය සෙට් වෙනවා කියලා කාගේ හරි බ්ලොග් එකක දැක්ක හින්දා.බ්ලොග් ලියන කට්ටිය කොයි වගේද කියන එකත් ෆොටෝ වලින්ම දැකගන්න පුළුවන් වුනා.සමහර ඈයෝ මං හිතන් හිටිය පෙනුමට වඩා සෑහෙන්න වෙනස්.හයියෝ! 

එහෙනම් ඉතින් ඊලඟ ගෙට්ටුවට මං අනිවා එනවා!

දැන් තෑගී නැති ප්‍රශ්නය :

සෑහෙන දවසකට පස්සේ අහන්න යන්නේ. වැඩ වැඩි වුනානේ.තරගේ කොහොමත් තියෙනවා.උත්සහ කරනවා අප්‍රේල් 21 තියෙනවා කියන ගෙට්ටුවෙදීම මේ වැඩෙත් ඉවරයක් කරන්න.

එහෙනම් මෙන්න අද ප්‍රශ්නය : 

ඔන්න විමල්,කමල්,නිමල් කියන තුන්දෙනා ට්‍රිප් එකක් ගියා අප්‍රිකාවවට.මේ තුන් දෙනා සහරා වලටත් ගියා.ඔහොම කාන්තාරේ  ඇවිදන් යද්දී වැලි කුණාටුවකට අහුවුනා මෙයාලව.කුණාටුව පහවෙලා යද්දී මේ තුන්දෙනා ආපු දිහාව හොයා ගන්න බැරුව අතරමං වුනා.ඉතින් ඔහේ ඉබාගාතේ ඇවිදින්න පටන්ගත්තා පාරක් හම්බවෙයි කියන බලාපොරොත්තුවෙන්.බොන්න ගෙනාපු වතුරත්ඉවරයි හැමෝගෙම.

ඔහොම ඇවිදන් යද්දී මෙයාලට ලීටර් 24 වතුර කෑන් එකක් කාන්තාරේ තිබිලා හම්බුනා.මෙයාලා කතාවෙලා තීරණයකට ආවා ඒ වතුර ලීටර් 24 සම සමව බෙදාගන්න. 

ඒත් මෙයාලා අතේ තිබුනේ එක එක සයිස් වල වතුර දාන්න පුළුවන් කෑන් 3ක්.ඒ කිව්වේ,

විමල් ළඟ ලීටර් 13 කෑන් එකක්

නිමල් ළඟ ලීටර් 05 කෑන් එකක්

කමල් ළඟ ලීටර් 11 කෑන් එකක්

මේ කෑන් තුන දකිද්දී පේනවනේ එහෙම සමානව වතුර බෙදාගන්න බෑ කියලා.ඒත් මේ තුන්දෙනා සමානව වතුර ලීටර් 24 බෙදාගත්තා.

ප්‍රශ්නය : ඒ කොහොමද? කෑන් වලට වතුර බෙදාගත්ත විදිය ගැන අහන්නේ.

කමෙන්ට් පබ්ලිෂ් වෙන්නේ මං හවස ගෙදර ආවට පස්සේ.හරි උත්තර සිකුරාදා පබ්ලිෂ් කරන්නම්.

හරි උත්තරේ : 

(මානවකගෙන් ගත්තේ) 
මුලින්ම මුලින්ම වතුර විමල් ගේ එකටයි කමල් ගේ එකටයි පුරවනවා එතකොට ලීටර 24 කෑන් එක හිස් 

ඊට පස්සේ විමල් ගේ කෑන් එකෙන් නිමල් ගේ කෑන් එක පුරවනවා.දැන් එතකොට විමල්ගේ කෑන් එකේ තියෙන්නේ ලීටර් 8 යි.ඒ කියන්නේ විමල්ගේ ප්‍රමාණය බෙදිලා.දැන් විමල්ගේ කෑන් එකේ තියන ලීටර් 8 ලීටර් 24 හිස් කෑන් එකට පුරවනවා.

දැන් මේ වෙනකොට කමල් ගේ කෑන් එකේ ලීටර් 11 කුත් නිමල්ගේ කෑන් එකේ ලීටර් 5 කුත් තියනවා.ඊට පස්සේ කරන්නේ කමල් ගේ කෑන් එකේ තියන ලීටර් 11 විමල්ගේ කෑන් එකට දමනවා.ඊට පස්සේ නිමල් ගේ කෑන් එකෙන් ඉතුරු ලීටර් 2 කේ අඩුව පුරවනවා.දැන් නිමල්ගේ කෑන් එකේ ඉතුරු වෙච්ච ලීටර් 3 කමල්ගේ කෑන් එකට දානවා.

දැන් කලින් විදියමයි විමල්ගේ කෑන් එකෙන් නිමල්ගේ කෑන් එක පුරවනවා.දැන් විමල්ගේ කෑන් එකේ ලීටර් 8 යි.ඊට පස්සේ නිමල්ගේ කෑන් එකේ තියන ලීටර් 5 අරන් කමල්ගේ කෑන් එකට දානවා.3 + 5 = 8 දැන් ඔන්න කමල් ගේ කෑන් එකෙත් ලීටර් 8 ක් තියනවා.

මේ පාර උත්තර දුන්නු හැමෝම හරි උත්තර දීලා තිබුනා. එක වැරදි උත්තරයක් තිබුනේ නෑ. කට්ටිය දැන් දියුණුයිනේ. එළ එළ!